सांगली : जतमधील भाजपचे माजी नगरसेवक विजय ताड यांच्या खून प्रकरणी अखेर पाच जणांची नावे निष्पन्न झाली असून चार जणांना अटक करण्यात आली आहे. धक्कादायक बाब म्हणजे या हत्या प्रकरणाचा मुख्य सूत्रधार हा भाजपचाच माजी नगरसेवक उमेश सावंत असल्याचं समोर आलं. मात्र हा खून नेमका कोणत्या कारणातून झाला आहे, हे अद्याप स्पष्ट झालं नसल्याची माहिती पोलीस अधीक्षक बसवराज तेली यांनी दिली आहे.
याबाबतची सविस्तर माहिती अशी की, सांगलीच्या जत या ठिकाणी १७ मार्च रोजी भरदिवसा भाजपचे माजी नगरसेवक विजय ताड यांची गोळ्या झाडून आणि डोक्यात दगड घालून हत्या करण्यात आली होती. विजय ताड हे दुपारच्या सुमारास आपल्या मुलांना शाळेतून आणण्यासाठी निघाले असता सांगोला रोडवरील अल्फान्सो स्कूलजवळ हल्लेखोरांनी गाडी अडवून त्यांच्यावर हल्ला चढवला होता. यावेळी पळून जात असताना त्यांच्यावर गोळ्या झाडण्यात आल्या होत्या, त्याचबरोबर त्यांच्या डोक्यामध्ये दगड घालून निर्घृणपणे खून करण्यात आला होता.
या घटनेने संपूर्ण जिल्ह्यात खळबळ उडाली होती. त्यामुळे ताड यांची हत्या कोणी केली आणि कोणत्या कारणातून केली, याबाबत उलट सुलट चर्चा सुरू होती. याप्रकरणी सांगली पोलीस अधीक्षक बसवराज तेली यांनी घटनास्थळी तातडीने धाव घेऊन गतीने तपास सुरू केला होता. या प्रकरणाच्या तपासासाठी चार पथके नियुक्त करण्यात आली होती आणि अखेर या प्रकरणी पाच जणांची नावे निष्पन्न झाली असून यामध्ये मुख्य सूत्रधार हा भाजपच्या माजी नगरसेवक उमेश सावंत असल्याची धक्कादायक माहिती समोर आली आहे.
