मुंबई | शिवसेना ठाकरे गटाचे खासदार संजय राऊत पुन्हा एकदा अडचणीत आले आहेत. तीन दिवसांपूर्वी संजय राऊत यांनी बार्शी येथील एका घटनेचे फोटो ट्विट करून भाजप नेत्यावर गंभीर आरोप केला होता. तसेच देवेंद्र फडणवीस यांना सवाल केला होता. हे प्रकण आता संजय राऊत यांच्यावरच उलटण्याची चिन्ह आहेत. बार्शीतील या घटनेचे फोटो ट्विट केल्याप्रकरणी पोक्सो कायद्याअंतर्गत संजय राऊत यांच्याविरोधात गुन्हा दाखल झाला आहे. रविवारी रात्री उशीरा संजय राऊत यांच्याविरोधात बार्शी पोलीस स्टेशनमध्ये गुन्हा दाखल झाल्याची माहिती समोर आली आहे. संजय राऊत यांच्या या ट्विटनंतर राजकीय हालचालींना वेग आला आहे. आता हे प्रकरण संजय राऊत यांनाच अंगलट येण्याची शक्यता आहे.
बार्शीत काही दिवसांपूर्वी घडलेल्या घटनेविषयी संजय राऊत यांनी दोन दिवसांपूर्वी ट्विट केलं होतं. बार्शी तालुक्यातील बळेवाडी येथील ही घटना होती. एका अल्पवयीन मुलीवर दोन तरुणांनी बलात्कार केल्याची घटना घडरी होती. मुलीने पोलिसात तक्रार दाखल केल्यानंतर त्याच दिवशी संध्याकाळी तिच्यावर काही तरुणांनी सत्तूर आणि तलवारीने हल्ला केला. यात ती मुलगी गंभीर जखमी झाली होती. राज्यभरात या घटनेचे पडसाद उमटले होते. विधानपरिषदेतही यावरून आवाज उठवण्यात आला होता. मात्र या प्रकरणात आरोपी अद्याप मोकाट असल्याचा आरोप राऊत यांनी केला होता. यासंदर्भात त्यांनी मुलीचा अत्यंत गंभीर, रक्तबंबाळ अवस्थेतील फोटो ट्विट करत भाजप नेत्यांवर आरोप केले होते.
संजय राऊत यांनी त्या ट्विटमध्ये देवेंद्र फडणवीस यांना उद्देशून संदेश लिहिला होता. बार्शीतील या घटनेत हल्लेखोर आणि बलात्कार करणारे भाजप पुरस्कृत आहेत, असा आरोप त्यांनी केला होता. बार्शीचे आमदार राजेंद्र राऊत यांना एकप्रकारे डिवचण्याचा प्रयत्न संजय राऊत यांनी केला होता. राजेंद्र राऊत अपक्ष असले तरीही भाजपाचे समर्थक आहेत. त्यामुळेच त्यांनी भाजप पुरस्कृत असा उल्लेख केल्याचं म्हटलं जातंय. मात्र आता बार्शीचा तो फोटो ट्विट केल्यावरून संजय राऊतच अडचणीत सापडले आहेत.
