म. टा. विशेष प्रतिनिधी, नवी दिल्ली : भारतरत्न डॉ. बाबासाहेब आंबेडकर यांच्या १३२व्या जयंतीनिमित्त सर्वोच्च न्यायालयात गुरुवारी सकाळी एका विशेष कार्यक्रमात त्यांना अभिवादन करण्यात आले. संसदेच्या ग्रंथालयातील डॉ. आंबेडकरांच्या छायाचित्राला सरन्यायाधीश धनंजय चंद्रचूड, न्या. भूषण गवई यांनी पुष्पांजली अर्पण केली. ‘सर्वोच्च न्यायालयाच्या आवारात बाबासाहेबांचा पुतळा उभारण्याच्या मागणीवर आपण सकारात्मक विचार करू,’ असे सरन्यायाधीशांनी यावेळी नमूद केले.
सरन्यायाधीश चंद्रचूड यांनी ११ एप्रिलला परिपत्रक जारी करून १४ एप्रिलला डॉ. आंबेडकर जयंतीनिमित्त सर्वोच्च न्यायालयास सुट्टी असेल, असे जाहीर केले होते. त्यामुळे गुरुवारी हा कार्यक्रम झाला. न्यायालय परिसरात डॉ. बाबासाहेब आंबेडकरांचा पुतळा बसवावा, अशी मागणी ‘डॉ. बाबासाहेब आंबेडकर लॉयर फॉर सोशल जस्टीस’ या संघटनेच्या वतीने करण्यात आली. सर्वोच्च न्यायालयाला दरवर्षी आंबेडकर जयंती, पुण्यातिथीनिमित्त सुट्टी मिळत असली, तरी न्यायालयाच्या अधिकृत कॅलेंडरमध्ये ती सुट्टी म्हणून घोषित केली जात नाही, याकडेही या संस्थेने निवेदनाद्वारे लक्ष वेधले आहे. राज्यघटना मसुदा समितीचे अध्यक्ष आणि देशाचे पहिले केंद्रीय कायदामंत्री असलेले डॉ. आंबेडकर हे देशातील कोट्यवधी उपेक्षितांचे मुक्तिदाता म्हणून आदरणीय आहेत. सर्वोच्च व अन्य न्यायालयांत काम करणारे हजारो कर्मचारी आंबेडकर जयंती साजरी करतात. १४ एप्रिल हा दिवस आमच्यासाठी दिवाळी, ईद किंवा ख्रिसमस इतकाच महत्त्वाचा आहे. त्यामुळे त्या दिवशी न्यायालयाने अधिकृत सुट्टी जाहीर करावी, अशी मागणी निवेदनात करण्यात आली आहे.