मुंबई: जगातील सर्वात मोठी क्रिकेट प्रीमियर लीग आयपीएलचा १६ वा सिझन ३१ मार्चपासून सुरू होत आहे. या स्पर्धेसाठी सर्व संघांनी जोमाने तयारी सुरू केली आहे. स्पर्धेतील सर्वात यशस्वी संघ असलेला मुंबई इंडियन्स गेल्या वर्षी खराब हंगामानंतर पुन्हा यंदा नव्या दमानिशी सज्ज होत आहे. या मोसमात मुंबईची कमान पुन्हा एकदा रोहित शर्माच्या हातात आहे. पण रोहित शर्मा यंदाच्या आयपीएलमध्ये सर्व सामने खेळताना दिसणार नाही आहे. त्यामुळे आता त्याच्या जागी कोण कर्णधार होऊ शकतो याबाबद्द जाणून घ्या .भारतीय क्रिकेट संघाचा हिट मॅन यावर्षी भारतात होणार्‍या आयसीसी एकदिवसीय विश्वचषक डोळ्यासमोर ठेवून वर्कलोड मॅनेजमेंटवर काम करत आहे. यंदाच्या आयपीएलदरम्यान तो मुंबई इंडियन्ससाठी सर्व सामने खेळणार नाही. त्याला कोणते सामने खेळायचे आहेत कधी विश्रांती घ्यायची आहे हे निवडणार असून त्यानंतरच तो मैदानात उतरणार आहे. इंडियन एक्सप्रेसच्या वृत्तानुसार, हा निर्णय कर्णधारासह संघ व्यवस्थापनाने घेतला आहे.
वृत्तानुसार, आयपीएलच्या १६व्या सिझनमध्ये रोहित शर्माच्या अनुपस्थितीत सूर्यकुमार यादव संघाची कमान सांभाळणार आहे. नियमित कर्णधार डग आऊटमध्ये उपस्थित राहून संघाच्या निर्णयांना मदत करेल. रोहित शर्माच्या देखरेखीखाली सूर्यकुमार यादव मैदानावर संघाचे नेतृत्व करताना दिसणार आहे.इंडियन प्रीमियर लीगच्या अंतिम फेरीनंतर अवघ्या नऊ दिवसांनी भारतीय संघाला जागतिक कसोटी चॅम्पियनशिपच्या अंतिम फेरीत ऑस्ट्रेलियाविरुद्ध खेळायचे आहे. लंडनच्या ओव्हल स्टेडियमवर हा सामना होणार आहे. हा सामना ७ जूनपासून खेळवला जाणार आहे. आणि आयपीएलचा अंतिम सामना २८ मे रोजी होणार आहे. वर्ल्ड टेस्ट चॅम्पियनशिप व्यतिरिक्त, आशिया चषक आणि ५० षटकांचा विश्वचषक देखील यावर्षी खेळवला जाणार आहे. हे लक्षात घेऊन रोहितने हा निर्णय घेतला आहे.इंडियन प्रीमियर लीग २०२३ चा १६ वा सीझन ३१ मार्च २०२३ रोजी सुरू होईल. पहिला सामना गतविजेत्या गुजरात टायटन्स आणि चेन्नई सुपर किंग्ज यांच्यात अहमदाबादच्या नरेंद्र मोदी स्टेडियमवर होणार आहे. त्याचवेळी रॉयल चॅलेंजर्स बंगळुरू आणि रोहित शर्माच्या मुंबई इंडियन्सचा संघ २ एप्रिलला बंगळुरूमध्ये आमनेसामने येणार आहे. अंतिम सामनाही २८ मे रोजी अहमदाबाद येथे होणार आहे.
