साेलापूर:सोलापूर हैदराबाद महामार्गाचे काम तीन वर्षे रखडले होते. आता कुठे सर्व्हिस रस्त्याचे काम पूर्णत्वाला जात आहे. दुचाकी, तीन चाकी, चार चाकी, बस आदी वाहनांसाठी सर्व्हिस रस्ता असतो, परंतु येथे वेगळेच पाहायला मिळत आहे. ट्रान्सपोटवाल्यांनी या सर्व्हिस रस्त्याचा वापर ट्रक पार्किंगसाठी सुरू केल्याने रहदारीस अडथळा होत आहे. मार्केट यार्डासमोरील शिवदारे मंगल कार्यालयापर्यंत हैदराबाद-सोलापूर महामार्गाची सीमा आहे. येथपर्यंत सर्व्हिस रस्त्याचे काम होत आले आहे. रस्ता दुभाजकाचे काम होत आहे.
सर्व्हिस रस्त्यावरील अतिक्रमणाबाबत राष्ट्रीय महामार्ग वाहतूक शाखा आणि शहर पोलिस वाहतूक शाखेने हा प्रश्न सोडवणे आवश्यक आहे. अन्यथा वाहतुकीची कोंडी होऊन अपघात निमंत्रण दिल्यासारखे होईल. शिवदारे मंगल कार्यालयापर्यंत महामार्गाचे चौपदरीकरण करण्यात आले आहे. येथून मार्केट यार्डपर्यंत २०० मीटर अंतर असून रस्ता करण्यासाठी महापालिकेने पाच वर्षापूर्वी अतिक्रमण काढले होते. आजपर्यंत येथे रस्त्याचे काम झाले नाही. हे काम राष्ट्रीय महामार्ग प्राधिकरणाच्या माध्यमातूनच होणार आहे. त्यामुळे प्राधिकरणाने हे कामही लवकर करणे गरजेचे आहे.
