यवतमाळ:अवघड क्षेत्रातील शिक्षकांच्या रिक्त ९५ जागा ऑनलाईन बदल्यांतून भरण्यात येणार आहे. त्या अनुषंगाने मंगळवार, दि. १४ मार्च रोजी शिक्षक बदलीचे पोर्टल सुरू झाले असून, १० वर्षांवरील शिक्षक ह्यासाठी पात्र ठरणार आहे. विशेष म्हणजे संवर्ग एक आणि ५३ वर्षांवरील ५२५ शिक्षकांनी नकार दर्शविला आहे. त्यामुळे अशा शिक्षकांना सध्यातरी बदल्यांमधून दिलासाच मिळाल्याचे स्पष्ट दिसून येत आहे. प्राथमिक शिक्षकांच्या ऑनलाईन बदल्यांमध्ये शिक्षकांनी सोयीच्या ठिकाणचे प्राधान्य नोंदवले होते. त्यानुसार आतापर्यंतच्या ५ टप्प्यात एकूण १ हजार ८५९ शिक्षकांच्या ऑनलाईन बदल्या झाल्या आहेत.
अवघड क्षेत्रातील रिक्त जागांकडे शिक्षकांनी पूर्णत: दुर्लक्ष केले होते. ह्या जागा भरण्याच्या दृष्टीने बदल्यांच्या सहाव्या टप्प्याला सुरूवात झाली होती. त्या अनुषंगाने १० वर्षांवरील शिक्षकांच्या सेवा ज्येष्ठ याद्या सुद्धा प्रसिद्ध करण्यात आल्या होत्या, परंतू ह्या याद्यात संवर्ग एक, ५३ वर्षांवरील शिक्षकांचा समावेश होता. त्यामुळे शिक्षकांमध्ये बदल्यांविरोधात कमालीची नाराजी उमटली होती. राज्यभरातील शिक्षक संघटनांनी शासनाला निवेदन दिले. तद्नंतर होकार आणि नकार दर्शविण्यासाठी शिक्षकांना मुदत दिली होती.या बदली पोर्टलमध्ये प्राधान्यक्रम नोंदवण्याकरिता चार दिवसांचा अवधी देण्यात आला असून, शुक्रवार, दि. १७ मार्च रोजी मध्यरात्री १२ वाजेपर्यंत शिक्षकांना अर्ज करता येणार आहे. तद्नंतर सॉफ्टवेअरच्या माध्यमातून बदल्यांची प्रक्रीया तीन चालविणार आहे. आणि मंगळवार, दि. २१ मार्च रोजी शिक्षकांच्या बदल्यांचे आदेश जिल्हा परिषदेला प्राप्त होणार आहे
