कोल्हापूर : ईडी छापेमारीनंतर माजी ग्रामविकास मंत्री आमदार हसन मुश्रीफ यांच्यावर २४ एप्रिलपर्यंत कोणतीही कठोर कारवाई न करण्याचे आदेश मुंबई उच्च न्यायालयाने पोलिसांना दिले आहेत. तर हसन मुश्रीफांवर सातत्याने भ्रष्टाचाराचे आरोप करणारे भाजप नेते किरीट सोमय्या यांना मुंबई उच्च न्यायालयाने तगडा झटका देत किरीट सौमय्यांविरोधात न्यायालयीन चौकशीचे आदेश जारी केलेत. दरम्यान हसन मुश्रीफ यांच्या कार्यकर्त्यांकडून या निकालाचे स्वागत करण्यात येत असून निकालानंतर हसन मुश्रीफ यांच्या समर्थनार्थ सोशल मीडियामध्ये पोस्ट व्हायरल होऊ लागल्यात.
हसन मुश्रीफ दोन महिन्यात दुसऱ्यांदा ईडीच्या रडारवर आले. याप्रकरणात कोल्हापूर जिल्हा मध्यवर्ती बँकेतही लेखापरीक्षण होणार आहे. अशातच साखर कारखान्याशी संबंधित कोल्हापूर आणि पुण्यात सर्च ऑपरेशन सुरु असल्याचे वृत्त एएनआय वृत्तसंस्थेनं दिलं. सरसेनापती संताजी घोरपडे कारखान्याच्या कथित ४० कोटींच्या गैरव्यवहार प्रकरणी ईडीकडून चौकशी सुरु आहे. त्याच अनुषंगाने कोल्हापूर जिल्हा बँकेतील काही खात्यांचाही तपास करण्यात येत असल्याची माहिती समोर येत आहे.
तर हसन मुश्रीफ यांनी त्यांच्यावर होत असलेल्या या कारवाई विरोधात न्यायालयात धाव घेतली असून त्यांच्यावर दाखल झालेले गुन्हे रद्द करण्याची याचिका त्यांनी उच्च न्यायालयात दाखल केली. दरम्यान याबाबत सुनावणी पार पडली असून यामध्ये हसन मुश्रीफ यांना मोठा दिलासा मिळाला. मुश्रीफ यांच्यावर भ्रष्टाचाराचे आरोप करणारे भाजप नेते किरीट सोमय्या यांना कोर्टाने तगडा झटका दिला.
सोमय्यांविरोधात न्यायालयीन चौकशीचे आदेश कोर्टाने दिले आहेत. हसन मुश्रीफ प्रकरणाशी कोणताही थेट संबंध नसताना किरीट सोमय्यांना कोर्टाच्या आदेशांची तसेच एफआयआरची कॉपी सर्वात आधी कशी उपलब्ध होते? असा खडा सवाल न्यायालयाने विचारला असून या प्रकरणी पुणे सत्र न्यायालयाच्या प्रधान न्यायाधीशांना चौकशीचे आदेश देण्यात आले आहेत.
दरम्यान, आज सुनावणी होत असताना न्यायालयाने सोमय्या यांची न्यायालयीन चौकशी करण्याचे निर्देश दिल्याने या निर्णयाचे कोल्हापुरात हसन मुश्रीफ समर्थक आणि सामाजिक कार्यकर्त्यांनी निर्णयाचे स्वागत केले असून कार्यकर्त्यांनी सोशल मीडियावर हसन मुश्रीफ यांचे फोटो झळकवत किरीट सोमय्या यांना, कराल का नाद परत? अशा शब्दात डिवचलं.
