शिंदे गटाचे आमदार व ज्यांच्या वादग्रस्त चित्रफितीवरून उद्धव ठाकरे गटाच्या अनेक कार्यकर्त्यांना अटक केली जात आहे, त्या प्रकाश सुर्वे यांच्या मतदारसंघात भाजप कार्यकर्त्याला झालेल्या मारहाणीवरून विधान परिषदेत भाजप व उद्धव ठाकरे गटाची अभूतपूर्व युती झाल्याचे चित्र दिसले. विधान परिषदेतील विरोधी पक्षनेते अंबादास दानवे यांनी भाजपच्या बिभिषण वारे यांना झालेल्या मारहाणीचा विषय सभागृहात उपस्थित केला. तर भाजपच्या प्रवीण दरेकर यांनी त्याला समर्थन दिल्याने शिंदे यांच्या शिवसेनेची वरिष्ठ सभागृहात कोंडी झाल्याचे पाहायला मिळाले.
मुंबईत दहिसरमध्ये वारे यांना लाठ्याकाठ्यांनी झालेल्या बेदम मारहाणीच्या घटनेचे सभागृहात सोमवारी तीव्र पडसाद उमटले. त्या भागातील पोलिस उपायुक्तांना तातडीने निलंबित करण्याची आग्रही मागणी दरेकर यांनी केली. तर घटनेच्या मुख्य सूत्रधाराला मोक्का लावण्याचा आग्रह दानवे यांनी केला. भाजप कार्यकर्त्यास मारहाण करणाऱ्या टोळक्याच्या सूत्रधाराला आज, मंगळवारी दुपारी १२वाजेपर्यंत अटक करण्याचे निर्देश उपसभापती डॉ. नीलम गोऱ्हे यांनी गृहविभागाला दिले आहेत.
‘दहिसरला सुर्वे यांच्याशी संबंधित सुमारे ५० जणांच्या टोळक्याने वारे नावाच्या कार्यकर्त्यास लाठीकाठीने मारहाण करून तलवारीने वार केले. यात आशीष नायर नावाचा गुन्हेगारही असून, त्यात आमदाराचा मुलाचा समावेशही असल्याचा आरोप दानवे यांनी केला. जखमी वारे यांच्यावर उपचारासाठी महापालिका रुग्णालयाने नकार दिला. पोलिस गुन्हा दाखल करून घेत नव्हते. भाजपचे सरकार असूनही सत्ताधारी कार्यकर्त्यावर प्राणघातक हल्ला होतो. मग मुंबईत कायदा व सुव्यवस्था उरली कुठे’, असा सवाल दानवे यांनी सभागृहात केला. तसेच गृहमंत्र्यांनी तातडीने निवेदन करण्याची मागणी दानवे यांनी केली.
दानवे यांच्या मागणीस दरेकर यांनी समर्थन दिले. जखमी झालेल्या वारे यांनी काही दिवसापूर्वीच भाजपमध्ये प्रवेश केला होता. त्यापाठोपाठ काही कार्यकर्ते भाजपमध्ये प्रवेश करणार होते. या राजकीय सूडभावनेने हल्ला झाल्याचा आरोप दरेकर यांनी केला. डोके, खांद्यावर वार असतानाही पोलीस तक्रार घेत नव्हते. यामुळे संबंधित पोलीस निरीक्षक, पोलिस उपायुक्त, आरोग्य अधिकाऱ्याला निलंबित करण्याची मागणी भाजपचे दरेकर यांनी केली. त्याच आमदाराने आड येणाऱ्यांचे हातपाय तोडा, तुम्हाला टेबल जामीन मिळवून देतो, असे वादग्रस्त वक्तव्य याआधी केले होते असे ठाकरे गटाच्या आ. अनिल परब यांनी निदर्शनास आणले. संबंधितांना वेळीच शिक्षा झाली असती तर त्यांची हिंमत झाली नसती. भाजपचा गृहमंत्री असताना भाजपच्याच कार्यकर्त्यावर हल्ला होतो, हे कशाचे द्योतक आहे असा परखड सवाल परब यांनी केला.दरम्यान, या घटनेबाबत गृहमंत्री तातडीने चौकशीचे आदेश देतील. चौकशीत दोषी आढळणाऱ्या व्यक्तींवर नियमानुसार कारवाई होईल. अधिकाऱ्यांवरील आरोप सिद्ध झाले तर त्यांच्यावरही कारवाई करू, असे आश्वासन मुनगंटीवार यांनी दिले.
