चाळीसगाव :हॉस्पिटलसमोर लावलेली दुचाकी चोरून नेताना, दुचाकी मालकाने आरडओरड केली. त्याचवेळी गस्तीवरील पोलिसांनी चोराचा सिनेस्टाईल पाठलाग करून ५०० मीटर अंतरावर त्याला पकडले. चोरट्याची चौकशी केली असता, त्याने चोरीची दुसरी दुचाकीही काढून दिली. शहरालगतच्या करगाव तांडा नं.३ चे रहिवासी रमेश पुना चव्हाण यांच्या मालकीची दुचाकी (एमएच.२०-एसी.९५८७), १६ मार्चला दुपारी १२ वाजेच्या सुमारास हिरापूर रोडवरील हॉस्पिटलच्या बाजूला लावलेली होती.संशयित रोहिदास पोपट मोरे (रा. तळेगाव) याने दुचाकी चोरली. ही बाब रमेश चव्हाण यांच्या लक्षात येताच त्यांनी आरडओरड केली. त्याचवेळी या रस्त्याने चाळीसगाव शहर पोलिस ठाण्याचे उपनिरीक्षक सुहास आव्हाड, पोलिस नाईक दीपक पाटील, विनोद खैरनार, राहूल सोनवणे, ज्ञानेश्वर गिते हे गस्तीवर जात होते. त्यांनी चोरट्याचा पाठलाग करून त्याला पकडले. संशयित मोरे याच्याकडून चोरी केलेली दुचाकी पोलिसांनी जप्त केली. तसेच चौकशीत संशयिताने चोरलेली दुसरी दुचाकी (एमएच.१९ सीबी.१६५१) काढून दिली.
