आष्टी :प्रेम व्यक्त करण्याच्या ज्याच्या त्याच्या वेगवेगळ्या पद्धती असतात परंतु बायकोला वाढदिवसाच्या दिवशी खुश करण्यासाठी या व्यक्तीने चक्क गौतमी पाटील चा डान्स ठेवला. प्रसिद्ध नृत्यांगणा गौतमी पाटील हिच्या नृत्याची क्रेझ आता एक दोन जिल्ह्यांपुरती मर्यादित राहिलेली नाही तर संपूर्ण महाराष्ट्राभर ही क्रेझ निर्माण झाली आहे. त्यामुळेच गौतमीचे महाराष्ट्रभर कार्यक्रम होताना दिसत आहे. केवळ कार्यक्रम होत नाहीत. तर तुफान गर्दीत कार्यक्रम होत आहेत. लोकांना उभं राहायला जागा राहत नाही, एवढी गर्दी गौतमीच्या कार्यक्रमाला होते. कधीकधी तर गौतमीच्या कार्यक्रमात हाणामाऱ्याही होताना दिसत आहेत. त्यामुळे पोलिसांना बळाचा वापर करावा लागत आहे. गौतमीच्या डान्सची क्रेझ इतकी की आता कोणत्याही निमित्ताने तिच्या डान्सचा कार्यक्रम ठेवला जात आहे. एका पठ्ठ्याने तर बायकोच्या वाढदिवसानिमित्ताने चक्क गौतमी पाटीलचा डान्स ठेवला. गौतमीच्या हाताने त्याने केकही कापला. त्यामुळे गावात चर्चा नाय नसती झाली तर नवलचं.
वाढदिवस साजरा करण्याचा सध्या अनोखा ट्रेंड सुरू झालाय. आष्टी तालुक्यातील निमगाव बोडखा येथील किरण गावडे यांची पत्नी प्रगती गावडे यांचा वाढदिवस सध्या चर्चेचा विषय बनला आहे. पत्नीच्या वाढदिवसानिमित्त चक्क नृत्यांगना गौतमी पाटील हिचा कार्यक्रम घेण्यात आला. एखाद्या महिलेच्या वाढदिवसानिमित्त गौतमी पाटीलचा शो हा राज्यातला पहिलाच प्रयोग ठरला आहे. गौतमी पाटील हिच्या हस्ते केक कापून हा वाढदिवस साजरा करण्यात आला. या अनोख्या वाढदिवसाला भाजप आमदार सुरेश धस यांनी देखील हजेरी लावली होती. यावेळी तरुणाईंनी देखील मोठी गर्दी केली होती. सध्या हा वाढदिवस जिल्ह्यात चर्चेचा विषय बनला आहे.या वाढदिवसाला गौतमी पाटील मराठमोळ्या पद्धतीने वेश परिधान करून आली होती. तर वाढदिवसासाठी मोठा केक आणण्यात आला होता. प्रगती यांनी केक कापल्यानंतर हा केक गौतमीला भरवला. त्यानंतर गौतमीनेही प्रगती यांना केक भरवत त्यांना वाढदिवसाच्या शुभेच्छा दिल्या.गौतमी पाटील यांच्या हस्ते केक कापण्यात आल्यानंतर गौतमी पाटील यांचा स्टेज शो झाला. यावेळी गौतमी पाटील यांच्या अदाकारी पाहण्यासाठी हजारो लोकांनी गर्दी केली होती. गौतमीच्या प्रत्येक गाण्यावर आणि तिच्या अदाकारीवर गावकरी फेटे उडवत होते. स्टेजच्या चोहोबाजूला लोकांची प्रचंड गर्दी झाली होती. नुसत्या टाळ्या आणि शिट्ट्यांची आतषबाजी सुरू होती. गौतमी पाटीलचा हा कार्यक्रम पाहण्यासाठी इतर गावातूनही लोक आले होते.
