मराठवाडा साथी न्यूज
पुणे : शिरूर कासार तालुक्यातील लोणी शिवारात शुक्रवारी पाच मोर मृतावस्थेत आढळले. ग्रामस्थांनी या प्रकाराची माहिती वन विभाग आणि पशुसंवर्धन विभागाच्या अधिकाऱ्यांना दिली. त्यानंतर अधिकाऱ्यांनी घटनास्थळी भेट दिली व मोरांचे नमुने तपासणीसाठी पुण्याच्या प्रयोगशाळेत पाठविले आहेत.
लोणी येथील दादाबा महानोर आणि अंबादास केदार यांच्या शेतात शुक्रवारी पाच मोरांचे मृतदेह येथील रहिवासी प्रा. भास्कर बडे यांना दिसले. त्यांनी याची माहिती वन कर्मचारी शिवाजी आघाव यांना दिल्यानंतर वनविभागाचे कर्मचारी, पशुवैद्यकीय अधिकाऱ्यांनी घटनास्थळी भेट देऊन माहिती घेतली. तेंव्हा मृत मोरांत तीन नर व दोन लांडोर आहेत.
पशुसंवर्धन अधिकाऱ्यांनी मृत मोराचे नमुने घेतले असून, ते तपासणीसाठी पुण्याच्या प्रयोग शाळेत पाठवण्यात आले आहेत. घटनास्थळी वनरक्षक बद्रीनाथ परजने, प्राणीमित्र सिद्धार्थ सोनवणे, वन कर्मचारी शिवाजी आघाव, पशुधन विकास अधिकारी डॉ. प्रदीप आघाव, पशुधन पर्यवेक्षक सोपान रानडे यांनी भेट दिली आहे.पशुसंवर्धन विभागाचे अधिकारी या भागात लक्ष ठेवून आहे. तालुक्यातील सर्व पशुवैद्यकीय दवाखान्यांना दक्ष राहण्याचे आदेश देण्यात आले आहेत, अशी माहिती पशुधन विकास अधिकारी डॉ. प्रदीप आघाव यांनी दिली.
