वाशीम : नागपूरहून पुणे येथे खासगी बसने प्रवास करणाऱ्या २४ वर्षीय तरुणीवर शस्त्राच्या धाकावर अत्याचार केला. ही धक्कादायक घटना मालेगावच्या हद्दीत घडली असून या प्रकरणी पीडितेने पुणे येथे पोहचल्यानंतर राजनगाव पोलिस स्टेशनमध्ये तक्रार दिली. ट्रॅव्हल्सचा क्लिनर समीर देवकर असे आरोपीचे नाव आहे. सदर प्रकरणाने खळबळ उडाली असून खासगी बसने प्रवास करणाऱ्या महिलांच्या सुरक्षेवर प्रश्नचिन्ह निर्माण झाले आहे.गोंदिया जिल्ह्यातील तरुणी ही राजनगाव एमआयडीसी येथे एका कंपनीत कार्यरत आहे.
सदर युवतीच्या चुलत बहिणीचे लग्न असल्यामुळे ती गावी आली होती. लग्नसोहळा आटोपून ६ जानेवारीला ती पुण्याला जाण्याकरिता नागपूर येथून गुडविल नावाच्या खासगी ट्रॅव्हल्स क्रमांक यूपी ७३ ए- ८०२०ने प्रवास करीत होती. दरम्यान या बसचा क्लिनर समीर देवकर (वय २८) रा. सीताबर्डी, नागपूर याने वाशीम जिल्ह्यातील कारंजा, मालेगाव ते बुलडाणा जिल्ह्यातील मेहकर या प्रवासादरम्यान युवतीला चाकूचा धाक दाखवून बसमध्ये लैंगिक अत्याचार केला. सदर प्रकाराची वाच्यता केल्यास धावत्या बसमधून फेकून देण्याची धमकी दिली. या प्रकारामुळे भेदरलेल्या पीडितेने घटनेची माहिती भ्रमणध्वनीवरून मैत्रिणीला दिली. यानंतर पीडितेनेराजनगाव पोलिस स्टेशन गाठून तक्रार नोंदविली. पोलिसांनी गुन्हा दाखल करून ट्रॅव्हल्स ताब्यात घेतली. आरोपी समीर देवकर याचा पोलिस शोध घेत आहे. राजनगाव पोलिसांनी सदर प्रकरण मालेगाव पोलिस स्टेशनकडे वर्ग केले. ठाणेदार आधारसिंग सोनोने, सहायक पोलिस निरीक्षक पुष्पलता वाघ तपास करीत आहेत.
