मेहुण्याला दिली होती धमकी
पुणे : मेहुण्याला गोळ्या घालून ठार मारण्याची धमकी दिल्याप्रकरणात भारतीय जनता पक्षाचे माजी खासदार संजय काकडे व त्यांच्या पत्नी उषा काकडे यांना गुरुवारी सकाळी चतु:श्रृंगी पोलिसांनी अटक केली. त्यांना दुपारी १२ वाजता न्यायालयात हजर करण्यात आले असता, त्यांची जामिनावर सुटका करण्यात आली.
या प्रकरणी युवराज ढमाले (वय ४०) यांनी चतु:श्रृंगी पोलीस ठाण्यात तक्रार दिली होती. बुधवारी काकडे यांना अटक करण्यासाठी चतु:श्रृंगी पोलिसांचे पथक त्यांच्या घरी आणि कार्यालयात गेले होते. परंतु ते त्या ठिकाणी सापडले नाहीत. गुरुवारी सकाळी घरी जाऊन त्यांना अटक करण्यात आली. त्यानंतर दुपारी १२ वाजता त्यांना न्यायलायात हजर करण्यात आले. यावेळी पोलिसांनी दोषारोपपत्र दाखल केले. या प्रकरणात काकडे दाम्पत्याला जामीन मंजूर करण्यात आला. ढमाले यांच्या वतीने विजयसिंह ठोंबरे यांनी बाजू मांडली.’हा कौटुंबिक वाद असून, दोन वर्षांपूर्वी धमकी दिल्याचा आरोप तक्रारदाराने आता केला आहे. या दोन वर्षांत तक्रारदारासोबत माझे आणि पत्नीचे साधे बोलणेही झालेले नसताना, मग आताच हे आरोप का केले याचे आश्चर्य वाटत आहे. आता यासंदर्भात न्यायालयीन प्रक्रिया सुरू आहे. आज न्यायालयात प्रत्येकी १० हजार रुपयांच्या जात मुचलक्यावर जामीन मंजूर झाला आहे. आम्ही न्यायालयाच्या प्रक्रियेचे पालन करत आहोत, ‘ असे संजय काकडे यांनी सांगितले.